【3月25 窩夫日】 瑞典窩夫同普通窩夫有咩唔同？

大家無睇錯呀，窩夫都有慶祝日㗎！ 講起窩夫，通常都會諗起美式或比利時嘅厚身窩夫，或者可以形容係香港格仔餅。而瑞典窩夫個樣反而係薄身嘅窩夫，同埋個邊邊位係心形，四個或五個心心拼埋一齊咁，特別之餘仲更加易食，唔洗嘥太多力水用刀切佢。窩夫、班戟、熱香餅其實主要都係由麵粉、雞蛋、牛奶、酵母等相似材料混合製成，但製成品就有分別。

窩夫日都有啲宗教起源，就係源於基督教「聖母節」。據福音書，3月25日係大天使加百列Gabriel 降臨人間後話俾瑪麗Mary知佢將會在9月後生下上帝之子嘅日子。一開始係慶祝聖母節(Vårfrudagen)，但瑞典語聽落有啲似vorfleday或 våffledagen (窩夫日)，慢慢就演變到係窩夫慶祝日啦。

今時今日，瑞典人都會喺呢個大日子整窩夫，同朋友家人一齊享受。窩夫配埋忌廉(grädde) 、越橘果醬(Lingonsylt)或士多啤梨醬(Jordgubbarsylt)、水果、雪糕，就已經係最經典嘅配搭。

雖然香港就未必買到瑞典窩夫機，整唔到心形薄窩夫，但係肉丸先生都有賣越橘果醬(Lingonsylt)，可以早餐pancake/飯後甜品窩夫配上呢個醬，感受下個風味先。

如果想試埋瑞典正宗啲嘅窩夫預拌粉同雲呢拿吉士醬(Marsan)，自己試整窩夫都可以去我哋姊妹店SverigeShoppen購買。