瑞典人嘅浪漫盛夏 – 瑞典仲夏節 Midsummer

6月26日係一年一度瑞典人嘅狂歡節日—仲夏節（Midsommar）！位處高緯度地區，瑞典年中大部分時間都係寒冷天氣，日照時間仲好短添。而仲夏節就係一年之中日照時間最長，亦係最和暖嘅日子。


對於國民嚟講，仲夏節係繼聖誕節後最重要嘅慶典日子。呢段期間大家都會遠離城市，去到鄉郊地區同屋企人、朋友享受園野生活同舉行慶祝活動。

被花與草包圍嘅浪漫夏天 

既然係萬物生長嘅時節，仲夏節最最最唔少得嘅一定係靚靚嘅花草。其中起一個仲夏柱（May Pole）更加係重頭戲。仲夏柱係十字架形狀再喺橫架上加兩個花圈，其中一個說法佢係象徵住生育、萬生甦醒生長嘅標誌。之後大家仲會着住民族服裝，以仲夏柱為中心跳青蛙舞、玩麻包袋賽跑等遊戲添㗎！



瑞典人不但會用當季鮮花、綠藤同絲帶裝飾仲夏柱，傳統嚟講女生同小朋友更加會去野外採花自製花冠。傳說仲夏節期間花草仲會有神奇嘅魔法力量，少女只要採集到七種唔同嘅花朵放喺枕頭底，就有機會邂逅到終身伴侶㗎喇！

除此之外，家人同朋友都會一齊喺草地度野餐，被花、草、樹木同陽光包圍，過一個極愜意嘅田園周末，享受呢個浪漫夏天。而家仲會有草地音樂會，揾嚟瑞典本土樂隊表演，大家聽住音樂、飲啤酒、跳舞，好chill㗎～

餐桌上嘅盛夏派對

講到明係狂歡節日，飲飲食食當然唔少得。

唔好以為瑞典淨係得肉丸，仲夏節嘅時候燉薯仔同不同口味嘅醃鯡魚先係主角，加埋酸奶、蒔蘿等香料醬汁或者沙律，就係當季嘅瑞典風味菜。餐枱上亦唔少得以唔同香辛料來釀製、超過40度酒精嘅烈酒Snaps（又名Akvavit，意思為生命之水），同濃味食物特別夾㗎！飲酒之前，大家仲要一齊唱祝酒歌先再碰杯飲添。

如果食唔慣醃鯡魚唔緊要，燒烤都係一個必備飲食活動。各家各戶都一定會搞BBQ Party，連超市都會準備定便攜燒烤套裝俾大家帶去草地享受。再加上啤酒同用咗當造士多啤梨做嘅蛋糕，完美點綴成個仲夏節。

瑞典仲夏節相關貨品傳送門： https://bit.ly/3LSqFd6